"ومازال فى مصر.. إلى عمر حاذق" قصيدة للشاعر سعيد شحاتة

ومازالت القضبان ما بتفرّقش
..... بين شاعر وبين مشعور
ومازالت الساقيه دايره
................. أعمى ماشى الطور
ومازال فى قلب الغلابه
........................ كتير عليه الدور
ومازال طابور الدرك
.............. ساحب فى إيده طابور
ومازال على الكرسى مارد
..................... حرفجى ومسعور
ومازال فى ريحتك وطن
.................. ومازال وطن مكسور
طب يعمل إيه اللى رافض
........................ سطوة الظالم
وهيعمل إيه اللى راسه
.................... اتعلّقت ع السّور

*************
سابوا اللى باعوا الدمّ بالقِربه
واتشطرّوا ع اللى احتكم للشعر
ما اعرفش ليه يا بلادى يا "طُربه"
بتعلّى سِعرِك وإحنا مالناش سِعر؟!

***********

الشعر مش مسلم ولا مسيحى
الشعر من طين مصر
الشعر...
شاهد ع التاريخ والعصر
على ثورة الشعرا ف قاعات القصر
والنصر ع العمده وعلى المتاريس
الشعر مش عتريس ولا قدّيس
الشعر...
وشّ عريس فى ليلة ضىّ
الشعر آيه ورايه وهدايه
وشعار وضحكه من المسيح الحىّ
الشعر...
راكية شاىّ ع السكّه
وبنات بترسم قلب ع الدكّه
وجنيه ورق على كام جنيه فكّه
وإيدين نضاف...
وإيدين بتتّكى ف وريد الأرض
وايدين بتخطف حلمها من الناس
وايدين بتخطف حلمها من البرد
الشعر...
– قال الطيبين – سنّه
الشعر...
– قال الطيّبين – لأ فرض
وكتير قوى اتفقوا إنه ميّة ورد
الشعر عرض وطول وتنهيده
وجريده دايره تهزّ فى جريده
وهدوم جديده بتسرق الأنظار
وسلاح مولّع همّة الثوّار
الشعر...
أحلى عيار يصيب القلب
الشعر طلقه ف عين ولاد الكلب

*************

إياك يموت ةالشعر فى القضبان
إياك يموت الجندى ع المدفع
الشعر روح بتحرك الأوطان
والجندى دافع دمّه وبيدفع

**************إلا الغلابه يا بنت سلطانك
إلا اللى زانوا الشعر بودانك
إلا اللى حط ضلوعه فوق سيفه
ووقف عشانك وانحنى وصانك

*************

يا كل واحد قلم يا قلب برايه
لو أرغمونا وباعونا ابقوا اشتروا مرايه
والصبح شوفوا وشوشكو فى البرواز
واتوضوا بالليل وصلّوا لحامل الرايه

**************

ومازال فى مصر السجن زى السلحفا والديب
.......................................... أعمى وكئيب
ومازال فى مصر الدكر
................................. مرهون بجوزة الطيب
ومازال فى مصر اللى يكتب شعر يتاخد
ومازال فى مصر اللى يكدب
............................. يبقى شيخ وخطيب

المصدر: اليوم السابع