"كوز الدرة: قصيدة جديدة للشاعر هشام الجنيدي

صورة أرشيفية

كوز الدرة ..
فى كفوف إديكى العيلة ..
آلة فلوت
و الميكروباص ..
رقاص ..
بيتمايل على انشاد قلوب الراكبين دلوقت
و الوقت...
ساند بضهره ع البيوت
حلفان ماهو ماضى انصراف
بيهز راسه بانسجام ...
زى اللى مستمتع قوي
كدة مش هروح للأبد
و أنا قلبى أطيب من قماشة طرحتك
و عمرى ما اقدر أقتله ...
راضى انى أفضل فى الشوارع للأبد
و أصاحب الوقت اللى رافض ..
إنه يمضى الانصراف ...
لما يموت ..
أو لما أموت
كوز الدرة ...
فى كفوف إديكى العيلة
ملكـوت !

المصدر: اليوم السابع