جديد "الفيس بوك" : "مش معايا غير دبلتين تتجوزيني"

"عايزين زواج أبسط .. من غير تعقيدات شكلية كتير .. مش لازم شبكة مكلفة .. و مش لازم فرح غالي جدا .. و التكاليف تروح فى الاساسيات ...

نظرا للارتفاع الشديد فى اسعار الذهب والانخفاض الشديد لقيمة الجنية وغلاء الاسعار وتشدد الاهالى فى مطالبهم قرر مجموعة من الشباب والشابات أخذ هذه المبادرة على عاتقهم وتبنى فكرة الغاء الشبكة او جعلها قيمة رمزية .

مش بندعوا لإن ميكنش فيه أي حاحجة فى الشبكة ..

كفاية دبلتين و توينز و خاتم ..
أو دبلتين و خاتم ..
أو دبلتين و محبس ..

عشان البنات تفرح بردو"

بهذه المقدمة البسيطة قامت بعض الشباب بإنشاء صفحة على الموقع الاجتماعى "فيس بوك" بإسم ( مش معايا غير دبلتين تتجوزيني ؟ الحملة القومية لألغاء الشبكة ) نظراً للظروف الإقتصادية التى تمر بها مصر و يمر بها العالم اجمع مع ارتفاع اسعار الذهب بشكل جنونى يفوق الخيال مما يصّعب الامور على الشباب الذى يفكر فى الارتباط خلال الفترة الحالية

وضمن الاقتراحات التى قدمها مؤسسو الصفحة التى وصل المشتركون بها إلى ٣٠ آلف أنه فى حال وصول عدد مشتركى الجروب إلى ١٠٠ ألف مشترك يتم جمع جنيهين من كل عضو، أى ما يعادل ٢٠٠ ألف جنيه أسبوعياً، ويتم عقد مسابقة للمقدمين على الزواج، لتجهيز ٢٠ شاباً وفتاة من الذين فازوا فى المسابقة.و علّق احد الشباب قائلاً : « هو انا ممكن اقول رأى ،
هو اللى احنا محتاجينه ان ميبقاش فى تذمت ف الطلبات اللى الاهالى بيطلبوها و ميبقاش فى تشدد فيها ( هو كده و خلاص و اللى مش عاجبه ) ازاى الرسول "ص" قال
( إذا جاءكم من ترضون دينه وخلقه فزوجوه ) و احنا نقلب الموضوع لماديات مش هاييجى من وراها غير المشاكل و وجع الدماغ و ان فى ناس ممكن تشيل من بعضها بسبب حاجة هايفة
و لو جينا نبص لجزء الماديات هنيجى و نلاقى ان الرسول "ص" قال ( تنكح المرأة لأربع لمالها ولحسبها ولجمالها ولدينها فاظفر بذات الدين تربت يداك ) مش معنى كدا ان دا هيبقى تكليف للمرأة بالماديات »

بينما علق أحد الشباب المشاركين قائلاً: «يا توافقى بالدبلتين يا كل واحد يروح لحاله يا بنت الناس»، وتساءلت إحدى الفتيات قائلة «ولما الواحدة وأهلها بقى يتساهلوا مع العريس المتقدم لبنتهم، ويخطب البت بدبلتين زى ما إنتوا بتقولوا ويفضل طالع داخل واكل شارب وفى الآخر بعد سنة يقوم سايبها، حيخسر إيه بقى؟ حق الدبلتين؟». فرد عليها أحد الشباب «إلى جميع البنات اللى رافضين الفكرة.. المصريات هيعنسوا وإحنا وراهم».

و للتواصل مع الصفحة :
http://www.facebook.com/no.shabkah

المصدر: مصطفى عبد البارى - طريق الأخبار